ՄԻԱՎ/ՁԻԱՀ-ի դեմ պայքարի օրվան ընդառաջ

ՀՀ առողջապահության նախարարության նախաձեռնությամբ Աղվերանում անցկացվել է «Զանգվածային լրատվամիջոցների դերը ՄԻԱՎ վարակի կանխարգելման գործում» երկօրյա սեմինար-վարժանքը:

Հաշվի առնելով, որ ՄԻԱՎ/ՁԻԱՀ-ի մասին տեղեկատվության հիմնական աղբյուրը լրատվամիջոցներն են և վերջիններիս տրամադրած տեղեկատվության հիման վրա է ձևավորվում մարդկանց վերաբերմուքը ՄԻԱՎ/ՁԻԱՀ-ի խնդրի և ՄԻԱՎ-ով ապրող մարդկանց նկատմամբ, բանախոսները լրատվամիջոցների ներկայացուցիչներին ներկայացրել են ոլորտում առկա խնդիրները, բուժման ուղղությամբ նորությունները, պատասխանել են հուզող հարցերին:

Նշենք, որ սեմինարի նպատակն է բարձրացնել լրագրողների իրազեկվածությունը` դեկտեմբերի մեկի` ՁԻԱՀ-ի դեմ պայքարի օրվան ընդառաջ:

«Կարծում եմ, որ այս դասընթացը կօգնի լրագրողներին առավել գրագետ լուսաբանել ոլորտը և կնպաստի մարդկանց իրազեկվածության բարձրացմանը»,- նշել է ՀՀ առողջապահության նախարարի մամլո քարտուղար Շուշան Հունանյանը:

Սեմինարի ընթացքում լրատվամիջոցների ներկայացուցիչների ուշադրությանը ներկայացվել են ՄԻԱՎ վարակի առանձնահատկությունները, ինչպես նաև ոլորտի այլ թեմաներին վերաբերող զեկուցումներ: Բանախոսներն անդրադարձել են ՄԻԱՎ վարակի կանխարգելման գործում տեղեկացվածության բարձրացման նշանակությանը, անցկացվել են խմբակային քննարկումներ, ցուցադրվել են ՄԻԱՎ/ՁԻԱՀ-ի վերաբերյալ հետազոտության և խորհրդատվության, փոխանցման ուղիների մասին ֆիլմեր:

Հարցեր, պատասխաններ, մեկնաբանություններ